The second verse of this song has a strong resemblance to MY GOD HOW THE MONEY ROLLS IN.

From The Scottish Songs By Robert Chambers, 1829, page 148ff, where it is said to come from The Tea-Table Miscellany, Ramsay, 1724.

SLICHTIT NANCY.

TUNE—Nobody coming to marry me.

IT'S I hae seven braw new gouns,
And ither seven better to mak';
And yet, for a' my new gouns,
My wooer has turn'd his back.
Besides, I have seven milk-kye,
And Sandy he has but three;
And yet, for a' my gude kye,
The laddie winna hae me.

My daddie's a delver o' dykes,
My mother can card and spin,
And I'm a fine fodgel lass,
And the siller comes linkin' in;
The siller comes linkin' in,
And it is fou fair to see,
And fifty times wow! O wow!
What ails the lads at me?

Whenever our Bawty does bark,
Then fast to the door I rin,
To see gin ony young spark
Will licht and venture but in;
But never a ane will come in,
Though mony a ane gaes by;
Syne ben the house I rin,
And a weary wicht am I.

When I was at my first prayers,
I pray'd but anes i' the year,
I wish'd for a handsome young lad,
And a lad wi' muckle gear.
When I was at my neist prayers,
I pray'd but now and than,
I fash'd na my head about gear,
If I got a handsome young man.

Now I am at my last prayers,
I pray on baith nicht and day,
And, oh, if a beggar wad come,
With that same beggar I'd gae.
And, oh, and what'll come o' me!
And, oh, and what'll I do!
That sic a braw lassie as I
Should die for a wooer, I trow!