This is a poem, not a song. Perhaps it has never been set to music, but it looks worthy of it.

From Fair City Chimes: A Book of Verse by David Mitchell Smith (Perth: Wood & Son, 1898), page 28:


THE PLOOMAN LADDIE.

Oh, I'm a happy lassie,
But my heart is no' my ain,
For a bonnie fair-hair'd laddie
Cam' stappin' doon the glen;
Cam' stappin' doon the lang glen,
Wi' buttons at his knee;
An' oh! the plooman laddie,
He's stown my heart frae me!

It's I had lovers plenty,
But my heart was in a creel,
For I downa gie my luve to a',
An' nane I likit weel;
Oh, nane I likit fondly,
Till, wi' his glamourie,
The fair-haired plooman laddie
He staul my heart frae me!

Blithe Jock, the muirlan' shepherd,
O, he courted me fu' fain!
An' his dancin' an' his daffin'
Were the pride o' a' the glen;
The pride o' a' the lang glen—
An' sair he teasëd me;
But the fair-hair'd plooman laddie
He's set my heart a-gee!

Rab Ha', the roysterin' laird's son,
He snooved aboot me lang,
But I cudna bide his silly clash,
Nor yet his sillier sang—
Nor yet his silly sang, I trow,
That spak' o' love to me,
For 'neath his braggin' words I kent
He'd little luve to gi'e!

Oh! I'm a happy lassie,
An' my breist is beatin' fain
To meet my fair-hair'd laddie
Come stappin' doon the glen—
Come stappin' doon the lang glen,
Wi' buttons at his knee;
For, oh! the plooman laddie,
He's a' the warl' to me.