I don't think this is the origin of the song we are seeking, although it has one line in common. I think it illustrates that we need to search for Scots spelling.

From Songs, by the Ettrick Shepherd by James Hogg (Edinburgh: William Blackwood, 1831), page 247:


I HAE LOST MY LOVE.
A bitter song against the women.

I hae lost my love, an' I dinna ken how,
I hae lost my love, an' I carena;
For laith will I be just to lie down an' dee,
And to sit down an' greet wad be bairnly;
But a screed o' ill-nature I canna weel help,
At having been guidit unfairly;
An' weel wad I like to gie women a skelp,
An' yerk their sweet haffits fu' yarely.

O! plague on the limmers, sae sly and demure,
As pawkie as deils wi' their smiling;
As fickle as winter, in sunshine and shower,
The hearts o' a' mankind beguiling;
As sour as December, as soothing as May,
To suit their ain ends, never doubt them;
Their ill faults I couldna tell ower in a day,
But their beauty's the warst thing about them!

Ay, that's what sets up the haill warld in a lowe;
Make's kingdoms to rise and expire;
Man's micht is nae mair than a flaughten o' tow,
Opposed to a bleeze o' reid fire!
'Twas woman at first made creation to bend,
And of nature's prime lord made the fellow!
An' 'tis her that will bring this ill warld to an end,
An' that will be seen an' heard tell o'!