Just tae pit it a' thegither.

WILLIE'S GONE TAE MELVILLE CASTLE

Chorus:        
Oh! Willie's gone tae Melville Castle,
Boots and spurs an' a'
Tae bid the lassies a' fareweel
Afore he gaes awa'
Willie's young and blithe and bonny
Lo'ed by ane an' a'
Oh! What will a' the lassies dae
When Willie gangs awa'?

The first he met was Lady Kate
She led him through the ha'
An' wi' a sad and sorry hairt
She let the tears doon fa'
Beside the fire sat Lady Grace
Said ne'er a word ava'
She thocht that she was sure o' him
Afore he gaed awa'

Then ben the hoose cam' Lady Belle
"Guid troth, ye neednae craw
Maybe the lad will fancy me
An' disappoint ye a'"
Then doon the stair tripped Lady Jean
The floo'er amang them a'
"Oh! Lassies trust in providence
An' ye'll get husbands a'"

Then on his horse he raced awa',
They gaithered roon' the door
He gaily wav'd his bonnet blue;
They set up sic a roar.
Their cries an' tears brocht Willie back
He's kissed them ane an' a'
"Oh! Lassies bide till I get hame
An' then I'll wed yez a'"