From Allan Ramsay, The Tea-table Miscellany (1788 ed., pp. 21-22):

SLIGHTED NANSY

Tune, The Kirk wad let me be.

'Tis I have seven braw new gowns,
And ither seven better to mak,
And yet, for a' my new gowns,
My wooer has turn'd his back.
Besides I have seven milk-kye,
And Sandy he has but three;
And yet, for a' my good kye,
The laddie winna ha'e me.

My dadie's a delver o' dykes,
My mither can card and spin,
And I am a fine fodgel lass,
And the siller comes linkan in;
The siller comes linkan in,
And it is fou fair to see,
And fifty times wow! O wow!
What ails the lads at me?

When ever our Baty does bark,
Then fast to the door I rin,
To see gin ony young spark
Will light and venture but in;
But never a ane will come in,
Though mony a ane gaes by,
Syne far ben the house I rin;
And a weary wight am I.

When I was at my first pray'rs,
I pray'd but anes i' the year,
I wish'd for a handsome young lad,
And a lad with muckle gear.
When I was at my neist pray'rs,
I pray'd but now and than,
I fash'd na my head about gear,
If I get a handsome young man.

Now when I'm at my last pray'rs,
I pray on baith night and day,
And O! if a beggar wad come,
With that same beggar I'd gae.
And O! and what'll come o' me!
And O! and what'll I do?
That sic a braw lassie as I
Should die for a wooer I trow.