O, 's gur tùrsach, tùrsach mi, Nam bitheadh mo dhùil ri triall À Uibhist nam beann àrda - 'S ann thugad tha mo mhiann; Gur òg a fhuair mi m' àrach ann Nam phàisde beag gun chiall - Is bòidheach leam do thràghannan Is gàir a' Chuain an Iar. 'S nuair thèid mi chun a' mhachaire Air feasgar samhraidh ciùin, 'S na neòineanan cho cùbhraidh 'S an sùilean dùint' fon driùchd, Nuair sheallainn ri Loch Hàllainn 'S na bric ri tràigh a' leum, Bu phailt an eala bhàn ann 'S na h-eòin a' snàmh na dèidh. 'S nuair dhìreas mi Cnoc Hàllainn 'S a sheallas mi mun cuairt, Mo chompanaich 's mo chàirdean 'S cuid dhiubh a' cnàmh san uaigh; Nuair shuidhinn air a' ghàrradh 'S mi coimhead far na bruaich, Mi smaointinn air an t-saoghal 'S na daoine gan toirt bhuainn. 'S cha chreid mi fhìn gur dìochuimhn' leinn Na bliadhnaichean a bh' ann; Na diùlnaich, chan eil sgeul orra, 'S iad tìodhlaicte san Fhraing; Dh'fhàg mnathan òga 's pian orra, 'S gun sìon aca dhan chloinn, 'S am fear a dhèanadh gnìomh riutha, Gur fhad' o chrìon a chom. 'S gun cuala h-uile h-aon agaibh An taobh tha 'n uamha àrd Far an deach am Prionns' air falach ann Nuair tharraing e bhon bhlàr. Bha saighdearan le gunnachan Ga shiubhal is ga lorg; Is e mar eun air allaban A' falach air an t-seòig. Is chì mi crodh air pàirceannan Is caoraich bhàn nan slèibh, Uain òga agus fonn orra Air feadh nan tom a' leum; A' mhil air bhàrr nam flùraichean, Ga sùghadh aig a' ghrèin, 'S a' chuthag is "gu-gùg" aice, Ga clùmhadh air gach geug. 'S their mise 'n cliù do Dhalabrog 'S na bheil ann, sean is òg, Ged 's iomadh àit' dhen t-saoghal Sam faodainn-sa bhith beò; Gur ann bu tric a bhuach'llich mi An sprèidh ri bruaich nan lòn, Is na laoigh bheag' air theadhraichean A' leum air cheann nan ròp. Ach sguiridh mi dhen òran seo 'S dhem ghòraiche gun bhuaidh - Thaobh 's gu bheil an òig' agam, Cha chòir dhomh bhith fo ghruaim; 'S ged gheibhinn aois a liathadh mi 'S a bheireadh dhìom a' ghruag, Cha leig mi chaoidh a dhìochuimhn' Uibhist ghrianach nan gleann uain'. https://www.bbc.co.uk/alba/oran/orain/oran_uibhist/ Written by Donald Allan MacDonald
|