I haue a 3ong suster
    fer be3ondyn þe se,
many be þe dowryis
    þat che sente me.

che sente me þe cherye
    with-outyn ony ston,
& so che ded þe dowe
    with-outyn ony bon.

sche sente me þe brer
    with-outyn ony rynde,
sche bad me loue my lemman
    with-oute longgyng.

How xuld ony cherye
    be with-oute ston?
& how xuld only dowe
    ben with-oute bon?

how xuld ony brer
    ben with-oute rynde?
how xuld y loue myn lemman
    with-out longyng?

Quan þe cherye was a flour
    þan hadde it non ston.
quan þe dowe was an ey,
    þan hadde it non bon.

Quan þe brer was on-bred,
    þan hadde it non rynd.
quan þe mayden ha3t þat che louit,
    che is with-out longing.