From Greene (a. British Museum. MS. Sloane 2593 XV cent):

f. 23v

A, a, a, a,
Nu[n]c gaudet ecclesia.

[1]
Lestenytgh, lordynges, bothe grete and smale;
I xal you telyn a wonder tale,
How Holy Cherche was brow[t] in bale
   Cum magna iniuria.

[2]
The greteste clerk of al this lond,
Of Cauntyrbery, ye vnderstond,
Slawyn he was [with] wykkyd hond,
   Demonis potencia.

[3]
Knytes kemyn fro Hendry Kyng,
Wykkyd men withoute lesyng;
Ther they dedyn a wonder thing,
   Feruentes insania.

[4]
They sowtyn hym al abowtyn,
Withine the paleys and withoutyn;
Of Jhesu Cryst hadde they non dowte,
   In sua malicia.

[5]
They openyd here mowthis wonder wyde;
To Thomeys they spokyn mekyl pryde:
'Here, tretour, thou xalt abyde,
   Ferens mortis tedia.'

[6]
Thomas answerid with mylde chere,
'If ye wil me slon in this manere, [f. 24r
Let hem pasyn, alle tho arn here,
   Sine contumilia.'

[7]
Beforn his aunter he knelyd adoun,
Ther they gunne to paryn his crown;
He sterdyn the braynus vp and doun,
   Optans celi gaudia.

[8]
The turmentours abowtyn sterte;
With dedly wondys thei gunne him hurte,
Thomas deyid in Moder Cherche,
   Pergens ad celestia.

[9]
Moder, clerk, wedue, and wyf,
Worchepe ye Thomeys in al your lyf
For lii poyntes he les his lyf,
   Contra regis consilia.