FESTIVAL O KEITH (Ian Middleton)

We've a' come here thegither for a family gaither-roon
We hae music o mixture that'll shak ye t' the foon
In the grand aul Scots tradition, be ye aul cuttin teeth
We extend a warm welcome t' the Festival at Keith

Hud er gyan, lads and lassies, hud er gyan, hud er gyan
Mak the hills ring wi' the music if ye can
Be it fussle, box or fiddle
Bothy ballad or a diddle
Hud er gyan, lads and lassies, hud er gyan

There's something here for a'body that's musically inclined
There's twa's and three's an soloists, an files the lot combined
They come fae a' the airts and pairts – fae Ettrick tae Dunbeath
For a gran weekeyne o music at the Festival o Keith

There's nae discrimination, be ye up or be ye doon
Be ye businessman or scaffie, be ye clerk or orraloon
We dinna care a docken, jist as lang's ye can bequeath
A success that's nivver endin t the Festival o Keith

So if yer bleed be sluggish or yer circulation poor
Or fitivver else is wrang wi' ye, we hae a ready cure
In the freenly little toonie, midst the heather, hills and heath
There's a cure for a' yer ailments at the Festival o Keith