From
Hogg, James. The Jacobite Relics of Scotland; Being the Songs, Airs, and Legends, of the Adherents to the House of Stuart. Edinburgh: Printed for W. Blackwood, 1819. (There is also musical notation on that page.)


DONALD MACGILLAVRY

1. Donald's gane up the hill hard and hungry,
Donald comes down the hill wild and angry;
Donald will clear the gouk's nest cleverly,
Here's to the king and Donald Macgillavry.
Come like a weighbauk, Donald Macgillavry,
Come like a weighbauk, Donald Macgillavry,
Balance them fair, and balance them cleverly:
Off wi' the counterfeit, Donald Macgillavry.

2. Donald's run o'er the hill but his tether, man,
As he were wud, or stang'd wi' an ether, man;
When he comes back, there's some will look merrily:
Here's to King James and Donald Macgillavry.
Come like a weaver, Donald Macgillavry,
Come like a weaver, Dnnald Macgillavry,
Pack on your back, and elwand sae cleverly;
Gie them full measure, my Donald Macgillavry.

3. Donald has foughten wi' rief and roguery;
Donald has dinner'd wi' banes and beggary:
Better it were for Whigs and Whiggery
Meeting the devil than Donald Macgillavry.
Come like a tailor, Donald Macgillavry,
Come like a tailor, Donald Macgillavry;
Push about, in and out, thimble them cleverly.
Here's to King James and Donald Macgillavry!

4. Donald's the callan that brooks nae tangleness;
Whigging, and prigging, and a' newfangleness,
They maun be gane: he winna be baukit, man;
He maun hae justice, or faith he'll tak it, man.
Come like a cobler, Donald Macgillavry,
Come like a cobler, Donald Macgillavry;
Beat them, and bore them, and lingel them cleverly.
Up wi' King James and Donald Macgillavry!

5. Donald was mumpit wi' mirds and mockery;
Donald was blinded wi' blads o' property;
Arles ran high, but makings were naething, man:
Lord, how Donald is flyting and fretting, man!
Come like the devil, Donald Macgillavry,
Come like the devil, Donald Macgillavry;
Skelp them and scaud them that prov'd sae unbritherly.
Up wi' King James and Donald Macgillavry!