This version has two more verses, and several small differences:

From A Scottish Ballad Book by David Buchan (London: Routledge & K. Paul, 1973), page 198:


JOHNNIE SANGSTER

1. Of a' the seasons o' the year
When we maun wark the sairest,
The harvest is the foremost time,
And yet it is the rarest.
We rise as seen as mornin' licht.
Nae craters can be blither.
We buckle on our finger-steels,
And follow oot the scyther.

CHORUS: For you, Johnnie, you, Johnnie,
You, Johnnie Sangster,
I'll trim the gavel o' my sheaf,
For ye're a gallant bandster.

2. A mornin' piece to line oor cheek,
Afore that we gae forder,
Wi' cloods o' blue tobacco reek,
We then set oot in order.
The sheafs are risin' fast and thick,
And Johnnie he maun bind them.
The busy group, for fear they stick,
Can scarcely look behind them.

3. I'll gie you bands that winna slip.
I'll plait them weel and thraw them.
I'm sure they winna tine the grip
Hooever weel ye draw them.
I'll lay my leg oot owre the shafe
And draw the band sae handy,
Wi' ilka strae as straucht's a rash,
And that'll be the dandy.

4. Some complain on hacks and thraws,
And some on brods and bruises,
And some complain on grippet hips,
And stiffness in their troosers;
But as soon as they lay doon the scythe,
The pipers yoke their blawvin,
And in ahint the rabble rook
They're owre the lugs wi' [tyawvin].

5. Oh, lazy wives they hinna skeel,
For a their fine pretences.
They'll gar ye trow they're never well,
And loll upon their hinches.
They sair themsels afore the lave
Wi a'thing in profusion,
And syne preten' they canna ate,
Their stammacks hisna fushion.

6. If e'er it chance to be my lot
To get a gallant bandster,
I'll gar him wear a gentle coat,
And bring him gowd in handfu's.
But Johnnie he can please himsel';
I wadna wish him blinkit.
Sae, aifter he has brewed his ale,
He can sit doon and drink it.

7. A dainty cowie in the byre,
For butter and for cheeses;
A grumphy feedin' in the stye
Wad keep the hoose in greases.
A bonnie ewie in the bucht
Wad help to creesh the ladle;
And we'll get tufts o' cannie woo'
Wad help to theek the cradle.