WILD GEESE
(Violet Jacob, Jim Reid)

Oh tell me fit was on yer road, ye roarin' Norlan' wind
As ye cam' blawin' frae the land, that's ne'er frae my mind
My feet they travel England, but I'm deein' for the North
My man, I saw the siller tides run up the Firth o' Forth

Ah, wind I ken them weel eneuch, and fine they fall and rise
And fain I saw the creepin' mist on yonder shore that lies
But tell me as ye passed them by, what saw ye on the way
My man I rocked the rovin' gulls that sail abune the Tay

But saw ye naethin' leein' wind afore ye cam' tae Fife
There's muckle lyin' 'yont the Tay, means mair to me nor life
My man I've swept the Angus braes, ye hae'na trod for years
Oh wind forgi'e a hameless loon that cannae see for tears

And far above the Angus strath I saw the wild geese flee
A lang, lang skein o' beatin' wings, wi' their heads towards the sea
And aye their cryin' voices trailed, ahint them on the air....
Oh wind, hae mercy, haud yer whisht, for I daurna listen mair

Enjoy! Håvard