The Jacobite Relics of Scotland by James Hogg (Edinburgh: William Blackwood, 1871), page 125:
^^
SONG LXIII.
THE HIGHLAND LADDIE.

Princely is my lover's weed,
  Bonny laddie, Highland laddie,
Fu' his veins o' princely blude,
  My bonny laddie, Highland laddie,
The gay bonnet circles roun',
  Bonny laddie, Highland laddie,
Brows wad better fa' a crown,
  My bonny laddie, Highland laddie.

There's a hand the sceptre bruiks,
  Bonny laddie, Highland laddie,
Better fa's the butcher's creuks,
  My bonny laddie, Highland laddie.
There's a hand the braid sword draws,
  Bonny laddie, Highland laddie,
The gowden sceptre seemlier fa's,
  My bonny laddie, Highland laddie.

He's the best piper i' the north,
  Bonny laddie, Highland laddie,
And has dang a' ayont the Forth,
  My bonny laddie, Highland laddie.
Soon at the Tweed he mints to blaw,
  Bonny laddie, Highland laddie.
Here's the lad ance far awa,
  The bonny laddie, Highland laddie!

There's nae a Southron fiddler's hum,
  Bonny laddie, Highland laddie,
Can bide the war-pipe's deadly strum,
  My bonny laddie, Highland laddie:
And the targe and braid sword's twang,
  Bonny laddie, Highland laddie,
To hastier march will gar them gang,
  My bonny laddie, Highland laddie.

And he'll raise sic an eldritch drone,
  Bonny laddie, Highland laddie,
He'll wake the snorers round the throne,
  My bonny laddie, Highland laddie;
Till frae his daddie's chair he blaw,
  Bonny laddie, Highland laddie,
"To your ain, my true men a',"
  My bonny laddie, Highland laddie.