The Jacobite Relics of Scotland by James Hogg (Edinburgh: William Blackwood, 1871), page 202:

SONG CV.
GEORDIE SITS IN CHARLIE'S CHAIR.
For the Air, see Song LXIII of this Volume.

Geordie sits in Charlie's chair,
  Bonny laddie, Highland laddie;
Deil cock him gin he sit there,
  My bonny laddie, Highland laddie!
Charlie yet shall mount the throne,
  Bonny laddie, Highland laddie;
Weel ye ken it is his own,
  My bonny laddie, Highland laddie.

Weary fa' the Lawland loon,
  Bonny laddie, Highland laddie,
Wha took frae him the British crown,
  My bonny laddie, Highland laddie.
But weel's me on the kilted clans,
  Bonny laddie, Highland laddie,
That fought for him at Prestonpans,
  My bonny laddie, Highland laddie.

Ken ye the news I hae to tell,
  Bonny laddie, Highland laddie?
Cumberland's awa to hell,
  My bonny laddie, Highland laddie.
When he came to the Stygian shore,
  Bonny laddie, Highland laddie,
The deil himsel wi' fright did roar,
  My bonny laddie, Highland laddie

Then Charon grim came out to him,
  Bonny laddie, Highland laddie;
"Ye're welcome here, ye devil's limb!"
  My bonny laddie, Highland laddie.
They pat on him a philabeg,
  Bonny laddie, Highland laddie,
And in his doup they ca'd a peg,
  My bonny laddie, Highland laddie.

How he did skip and he did roar,
  Bonny laddie, Highland laddie!
The deils ne'er saw sic sport before,
  My bonny laddie, Highland laddie.
They took him neist to Satan's ha',
  Bonny laddie, Highland laddie,
To lilt it wi' his grandpapa,
  My bonny laddie, Highland laddie.

The deil sat girnin in the neuk,
  Bonny laddie, Highland laddie,
Riving sticks to roast the duke,
  My bonny laddie, Highland laddie.
They pat him neist upon a spit,
  Bonny laddie, Highland laddie,
And roasted him baith head and feet,
  My bonny laddie, Highland laddie.

Wi' scalding brunstane and wi' fat,
  Bonny laddie, Highland laddie,
They flamm'd his carcass weel wi' that,
  My bonny laddie, Highland laddie.
They ate him up baith stoop and roop,
  Bonny laddie, Highland laddie;
And that's the gate they serv'd the duke,
  My bonny laddie, Highland laddie.