From The History of Blairgowrie by John A. R. Macdonald (Blairgowrie: Printed at the Advertiser Office, 1899), page 142:

^^
THE GREEN LADYE O' NEWTON.

1. The ladye Jean sits in her bower,
Her cheeks are like the snaw;
She winna work, she canna play,
Sin' Ronald's gaed awa'.

2. "Gae bring tae me the crimson silk,
Gae bring tae me the blue;
Gae bring my siller-buckled shoon,
My satyne boddice new.

3. "An' busk me in my cramasie,
But an' the velvet black,
My perlin's fine, an' gowden kame,
To wile my fause love back."

4. Up an' spak a grey auld wife,
Was fourscore years an' mae:—
"Licht, licht's the luve that can be coft
Wi' gowd an' buskins gay.

5. "But an' ye be young Ronald's bryde,
A sair darg ye maun dree:
For the witchin' claith ye canna buy
Wi' the red an' white monie.

6. "Gae cut a bout o' the kirkyard grass,
An' a branch frae the rowan tree
That stands by itsel' on the Gallows Knowe,
Whar they hanged the murderers three.

7. "Gae twist an ell-lang rashy wyth,
An' tak' them doon alane
Tae the Coble Pule, 'tween the licht an' the dark,
An' sit on the Corbie Stane."

8. She has ta'en her a bout o' the kirkyard grass,
An' a branch frae the rowan tree,
That stands by itsel' on the Gallows Knowe,
Whar they hang'd the murderers three.

9. She has twisted an ell-lang rashy wyth,
An' sits in her bower alane,
Wi' her heart in a lowe, at the thocht o' her luve,
An' she waits till the day is gane.

10. An' at nicht she gaed tae the Coble Pule,
The licht an' the dark atween,
An' a' that nicht, frae dark tae licht,
She sat wi' steekit een.

11. She hadna sat an oor ava,
Never an oor but ane,
Whan she heard the win' sough thro' the trees
Wi' an eerie, eerie grane.

12. An' next she heard the howlets' cry
Within the saughen wud,
An' next the water kelpies' rout
Aboon the Ericht's flood.

13. An' then she heard, jist at her lug,
A gruesome, eldritch lauch;
An' then a voice cam' up the stream
Frae oot the Mill o' Haugh:—

14. Warlock wabsters, ane an' a',
Weave the witchin' claith;
Warp o' grass an' weft o' rash—
Weave the web o' death."

15. But aye she sat, an' aye she sat.
Nor spak' the lang nicht thro',
She was deadly cauld, an' her heart was glad
Whan the early gor-cock crew.

16. An' at the dawin' o' the day,
Whan she oped her steekit een,
She wis dinket out frae head tae heel
In the witchin' claith o' green.

. . . . . .

17. There's mirth an' daffln' in Newton Ha'—
The lady Jean's a bryde;
She's cled in a gown o' the witchin' claith,
An' she stands at Ronald's side.

18. "Wae's me for you, my ain true love,
That ever this should be;
But a mortal cauld is at my heart,
I fear that I maun dee.

19. "An' I hear a soon' that I heard afore,
Whan a' my leafu' lane,
Thro' the mirk midnicht tae the inornin' licht
I sat on the Corbie Stane."

20. They hae ta'en her up tae a chamber hie,
An' sune she steekit her een;
They hae streekit her corpse on the brydal bed,
In her brydal bed o' green.