The Mudcat Café TM
Thread #135803   Message #3098352
Posted By: Dave MacKenzie
18-Feb-11 - 07:37 PM
Thread Name: Lyr Req: The Battle of Harlow / ...Harlaw (#163)
Subject: RE: Lyrics of 'The Battle of Harlow' (Harlaw)
HARLAW (#163)

As I cam' by the Garioch land
And doon by Netherha'
There were fifty thoosand Hielanmen
A-marchin' tae Harlaw.

Singin' didee-i-o,
Sing fal la do,
Sing didee-i-o-i-ay.

It's did ye come frae the Hielans, man
Or did ye come a' the wey,
An' did ye see MacDonald an' his men
As they marched frae Skye?

For I've come frae the Hielans, man,
An' I've come a' the wey,
An' I saw MacDonald an' his men
As they marched frae Skye.

It's wis ye near and near enough,
Did ye their number see?
Come tell to me, John Hielanman,
What might their number be?

For I was near and near enough
An' I their number saw:
There were fifty thoosand Hielanmen,
A-marchin' tae Harlaw.

For they went on and furder on
An' doon an' by Balquhain:
It's there they met Sir James the Rose,
Wi' him Sir John the Graham.

"If that's be true", said Sir James the Rose,
"We'll no come muckle speed.
We'll call upon oor merry me
An' we'll turn oor horses' heids".

"Oh nay, oh nay", said Sir John the Graham,
"Sic things we maunna dee:
For the gallant Grahams were never bate
An' we'll try fit they can dee".

For they went on an' furder on
An' doon an' by Harlaw:
They fell full close on ilka side,
Sic strikes ye never saw.

They fell full close on ilka side,
Sic strikes ye never saw
For ilka sword gied clash for clash
At the battle o' Harlaw.

But the Hielanmen wi' their lang swords
They laid on us fu' sair;
They drove back oor merry men
Three acres breadth an' mair.

Lord Forbes tae his brither did say
"O brither, dinna ye see?
They beat us back on every side,
And we'll be forced to flee".

"O nay, o nay, my brither dear,
O nay, that maunna be.
Ye'll tak' your guid sword in your hand
An' ye'll gang in wi' me".

For the twa brithers brave
Gaed in amangst the thrang;
They struck doon the Hielanmen
Wi' swords baith sharp an' lang.

The first strike Lord Forbes gied
The brave MacDonald reeled;
The second strike Lord Forbes gied
The brave MacDonald fell.

What a cry amangst the Hielanmen
When they seed their leader fa';
They lifted him an' buried him
A lang mile frae Harlaw.

Gin onybody speir at you
For them that cam' awa',
Ye can tell them plain an' verra plain
They're sleepin' at Harlaw.

From the singing of Jeannie Robertson. As printed in "The Scottish Folksinger", collected and edited by Norman Buchan and Peter Hall, Collins, 1973.