This text is from Folk-Song in Buchan: and Folk-Song of the North-East by Gavin Grieg (Hatboro, Pa., Folklore Associates, 1963.). I had to piece this together from several "snippets" so it might not be complete and there could be some errors.

THE WEDDIN' OF MCGINNIS TO HIS CROSS-EYED PET

Pey attention tae my sang, an' I'll tell ye o' a weddin'
On the thirty-first o' July, at the toon o' Sleepy'-steadin';
A' the countryside wis there, for ye didna need a biddin
Tae the mairrage o' M'Ginnis tull his cross-eyed pet.

There wis lots o' fun an' frolic, tho' we hidna a piana
But a fluter wi' a niz for a' the earth like a banana,
An' a piper wi' his chanter in a seek that heeld guana
At the mairrage o' M'Ginnis tull his cross-eyed pet.

Tootle tootle gaed the flute, fiddle fiddle gaed the fiddle
They gaed reelin' oot an' in again, an' up an' doon the middle;
An' they ging-a-ringit roon aboot like sheelicks roon a riddle.
At the mairrage o' M'Ginnis to his cross-eyed pet.

A fiddler he cam' doon the howe, fae Mains o' Butterscotlie,
An' his fiddle it wis cobbit up wi' batter, glue, an' potty;
If the instrument wis paralyst the fiddler he gaed dotty.
At the mairrage o' M'Ginnis tull his cross-eyed pet.

Av, an' syne there wis some singin' fae a cheelie ca'd Macara,
Till he tried them wi' a versie o' a sang they ca' Ta-ra-ra;
He gaed there upon a bicycle, hit hame upon a harra
Fae the mairrage o' M'Ginnis tull his cross-eyed pet.

A tinkler wi' a timmer leg he danc't like ane dementit;
In the middle o' a fowersome reel he brak' it throu' an' tint it,
But they men't it wi' a barra tram, an' he gaed hame contentit
Fae the mairrage o' M'Ginnis to his cross-eyed pet.

Fin M'Ginnis yokit tee tae dance ye never iaw his marra,
'Twid-a' min't ye on a grubber dancin' wi' an iron harra,
Tull he tum'lt ower the sweetie wife an' landit in her barra,
At the mairrage o' M'Ginnis tull his cross-eyed pet.

There wis pottit heid an' herrin' reed, and jeely on the table,
An' a rooth o' tatie bannocks near as heich s the toor o' Babel;
There wis roly-polys roon the sides, an' hens at ilka gable
At the mairrage o' M'Ginnis tull his cross-eyed pet.

Syne some gaed east an some gaed wast, an' tee the door wis yarkit,
For the din wis like the skellin' o' a Faistern Even market ;
But I fell doon an open drain, an' baith my shins wis barkit,
Stytterin' hameworth fae the mairrage o' M'Ginnis tull his cross-eyed pet.