From The Universal Songster; or, Museum of Mirth...Vol. 1 (London: John Fairburn et al., 1825), page 266:


JESSIE, THE FLOWER O' DUNBLANE.
(Robert Tannahill.)

The sun has gane down o'er the lofty Ben Lomond,
And left the red clouds to preside o'er the scene;
While lanely I stray in the calm simmer gloaming,
To muse on sweet Jessie, the flow'r o' Dunblane.
How sweet is the brier, wi' its saft faulding blossom,
And sweet is the birk, wi' its mantle o' green;
Yet sweeter and fairer, and dear to this bosom
Is lovely young Jessie, the flow'r o' Dunblane.

She's modest as ony, and blythe as she's bonny,
For guileless simplicity marks her its ain;
And far be the villain, divested o' feeling,
Wha'd blight in its bloom the sweet flow'r o' Dunblane.
Sing on, thou sweet mavis, thy hymn to the e'ening,
Thou'rt dear to the echoes o' Calderwood glen;
Sae dear to this bosom, sae artless and winning,
Is charming young Jessie, the flow'r o' Dunblane.

How lost were my days, till I met wi' my Jessie,
The sports o' the city seem'd foolish and vain;
I ne'er saw a nymph I would ca' my dear lassie,
Till charm'd wi' sweet Jessie, the flow'r o' Dunblane.
Though mine were the station o' loftiest grandeur,
Amidst its profusion I'd languish in pain;
And reckon as naething the height o' its splendour,
If wanting sweet Jessie, the flow'r o' Dunblane.