It seems this song was first published as a poem:

From The Scots Magazine, Vol. 64, Edinburgh, July, 1802, p. 593:

For the Scots Magazine.

THE NEGLECTIT LASSIE.
Duncan Gray

AS Bessy sat down wi’ her seam at the fire,
She thought on the time that was fast gaun by’er,
And said to herself, wi’ a heavy hiegh-hie,
Oh, a’ body’s like to be married but me.

My youthfu’ companions are a’ worn awa,
And though I’ve had woers myself ane or twa,
A man to my mind ne’er yet proffer’d his loe,
Oh, a’ body’s like to be married but me.

There’s Geordie the lawyer, wad hae me fu fain,
And he’s bought a house, a’ wi’ gear o’ his ain,
But ere I gang in till’t, a maiden I’ll die,
A wee stumpin’ bodie shall never get me.

Syne Tammy, my cousin, frae Lon’on came down,
Wi’ wide yellow buckskins that dazzled the town,
Poor d—l, he gatna a blink o’ my e’e,
Oh, a’ body’s like to be married but me.

But I met a lad by the sauchy burn side,
Wha well wad deserv’d ony queen for his bride,
Gin I’d had my will then, the tale sudna’ be,
That a’ body’s like to be married but me.

I gied him a look as a kind lassie shoud,
My friends, if they kent it, would fairly rin wood,
Tho’ bonny and guid, he’s nae worth a bawbee,
Oh, a’ body’s like to be married but me.

It’s hard to take shelter ahint a laigh dyke,
It’s hard to take that we dinna well like,
It’s hard to forsake ane we fain wad be wi’,
It’s harder that a’ body’s married but me.