On being frightened of the dark.

Ghaists an bogles, baukies tae,       
Flit aboot when the lift is grey,         
Frichten weans wha fear the nicht
An gar them seek an ingle bricht.     

They  steek their heids ablow the sheets
When bedtime beckons time tae sleep.
Whit lurks in Ilka shadow, dark,             
Can only be Auld Clootie’s wark.           

An only speerits micht be seen             
Wi pairted fingers ower oor een.           
But Ah wis wee then, lang, lang syne
Afore yer haun an hert touched mine     

            …aiblins                                         

An when Ah hear a hoolet cry                   
Or eerie creak or ghaistly sigh
Ah listen fur anither noise
Ah listen hard…….is that your voice?

Could you be there, a speerit free?
Come back tae sing yer sang tae me?
Your ghaist wad be a welcome sicht.
Ah fearna dark……
PIT OOT THE LICHT!