The Mudcat Café TM
Thread #53090 Message #815535
Posted By: seaayr
31-Oct-02 - 06:26 PM
Thread Name: halloween
Subject: Lyr Add: HALLOWEEN (Violet Jacob)
the tattie liftin's nearly through
theyre plowin whaur the barley grew
and aifter dark, roond ilka stack
ye'll see the horsemen stand and crack
o lachlan, but i mind o you !
i mind foo often we hae seen
ten thoosand stars keek doon atween
the nakit branches, an below
baith fairm an' bothie hae their show,
alowe wi' lichts o' halloween.
there's bairns wi' guizards at their tail
clourin' the doors wi' runt o' kail,
and fine ye'll hear the skreichs an' skirls
o' lassies wi' their droukit curls
bobbin for aiples i' the pail.
the bothie fire is loupin' het
a new heid horseman's kist is set
richts o' the lum; whaur by the blaze
the auld ane stude that kept yer claes
i canna thole to see it yet !
but gin the auld fowks' tales are richt
an' ghaists come hame on hallow nicht,
o freend o' freends, what wad i gie
to feel ye rax yer hand to me
atween the dark an' can'le-licht ?
awa' in france, across the wave,
the wee lichts burn on ilka grave,
an' you an' me their lowe hae seen.....
ye'll mebbe hae yer halloween
yont, whaur ye're lyin' wi' the lave.
there's drink an' daffin', sang an' dance,
and ploys and kisses get their chance,
but lachlan, man, the place i see
is whaur the auld kist used to be
and the lichts o' halloween in france.......
a thought for halloween.................
violet jacob..................
1915..................